خبرگزاری دید: گزارشها از تاجیکستان نشان میدهد که فضای امنیتی علیه مهاجران افغانستانی بهطور محسوسی تغییر کرده و طی روزهای اخیر دهها خانواده افغانستانی در عملیاتهای ناگهانی پولیس بازداشت یا به کمپهای ویژه منتقل شدهاند.
به گفته منابع محلی، نیروهای امنیتی تاجیکستان در چندین منطقه، بهویژه در ناحیه جبار رسولاُف، خانههای مهاجران را بازرسی کرده و گروهی از آنان را بهصورت اجباری به کمپهایی در شهر دوشنبه منتقل کردهاند. برخی مهاجران مدعیاند که در جریان این عملیات، سیمکارتهای تلفن همراهشان ضبط یا شکسته شده است.
همزمان، وزارت کشور تاجیکستان اعلام کرده که یک مرد ۲۲ ساله افغانستانی را بهدلیل «اقامت غیرقانونی» بازداشت کرده و برای او پرونده جنایی تشکیل شده است. این وزارتخانه جزئیات بیشتری درباره موج اخیر عملیاتها ارائه نکرده است.
فعالان حقوق مهاجران میگویند که طی ماههای اخیر فشارهای امنیتی بر افغانها در تاجیکستان افزایش یافته و بسیاری از خانوادهها با خطر بازداشت، انتقال اجباری یا اخراج روبهرو هستند. این در حالی است که هزاران شهروند افغانستان پس از تحولات سیاسی سال ۲۰۲۱ به تاجیکستان پناه بردهاند و بسیاری از آنان هنوز وضعیت اقامتی مشخصی ندارند.